يامه قومى
قصيده
يامه قومى
وقولى لولادك
حرام
مدى إيدك
واقرصى ودانهم
ملام
واشخطى وهبىّ
زى ماتحبىّ
واضربى بالصرمه
إبنك
أى ابن يرد قولك
أو مايسمعش الكلام
..........
يامه
مش قادر أعبّر
اللى حاصل
فوق خيالى
فوق ظنونى
ومش ف بالى
آل
بنتعارك سوا
ماحنا
ياما
كنا نتعارك سوا
بس كنا
تمللى حاضنين بعضنا
فى العراك
فى اللعب
حتى ف كرهنا
حتى فى خناقنا
اللى كان جوانا حب
وشىء جميل كده زينا
يامه قومى
رجعى الشمس
لعيون صبحت ظلام
أيوه قومى
واصرخى يولاد حرام
................
أمكم ياولاد جريحه بتشتكى
سيبوا حبه خناقكوا
علشان امكوا
دمعها
مغرق هدومها
والعيون
مليانه أحزان منكوا
قلبها مفطور عليكوا
وإنتوا خانقين بعضكوا
يامه بالله اسكتى
تقول ولادى
ولاد حلال
مش بذره
محطوطه فى حرام
طب ليه بقى بتعيطى
تقول ياريتهم يسمعوا
منى الكلام
.............
ياولاد حيحصل الإنهيار
وساعتها كله حينحنَى
النار تمللى وراها نار
والموت
بيحصد فى البرىء
واللى جنى
وخراب بيوتكم
مش قرار
ده جنون
دمار
حيذلنا
فوقوا وأمانه تفكروا
ضموا الإيدين واتدبروا
بلاش نضيّع أمنا
بلاش نضيع بعضنا
بلاش نضيع أمننا
بلاش نضِيع كده كلنا
بلاش !!
المشاركات
