بكره حنتبسم

ياشعب

قول كلمتك

بالحق

مش بالزور

وامسك

زمام

وحدتك

وحدة كيان

وحضور

ورّى الوجود همتك

وارفع عينيك

للنور

وقول

لكل الغير

مصر الامل والخير

حارسها

رب قدير

ضد الظلام  والجور

يامصر

من حكمتك

اتعلموا الحكمه

فى كل شىء

بصمتك

بالصوره والكلمه

غيوم

وجت يمتك

وراحت الغمه

واللى فضل

لينا

النيل بيروينا

وايمان عميق فينا

بينور الضلمه

ياشعب

رج الكون

وانطق بكرة حنتبسم

بقى واحسم

اللى انكتب حيكون

ياشعب يامسلم

الصعب كله يهون

مهما حنتألم

الايد

مادام واحده

وقلوبنا متحده

عالحب

والوحده

بكرة حنتبسم

ياله نعمل مليونيه

ياله بينا نقوم ونعمل مليونيه

ننزل التحرير ونهتف كلنا بصرخه وقويه

 والصور والفيديو ينزل والصحف تكتب شويه

والفلوس فى ايدينا تجرى وكله ماشى بدون أذيه

واللى يسأل ليه نزلتوا نقوله  بحروفنا البهيه

 مصر ست الكل ياعوازل أبيه

مصر مش عزبة ابوكم مش وسيه

ييجى يسأل عن مطالب  كل واحد له قضيه

واما تسأل أى واحد يشكى فى همومه العاديه 

يعنى مصر الحلوه بدموعها الشجيه

واحنا ملايين المطالب والبلد حتروح ضحيه

يبقى انتاجنا الكلام وحروف عفيه

 والمصانع لسه واقفه تنعى ايامها اللى جايه

 ياللى رايحين عالميدان مليون تحيه

ياله نتصور ونقبض والجرايد تنشغل بالمليونيه

ياله نعمل مليونيه

فى الضلمه

فى الضلمة كلنا نتساوى

قلوب تزقزق بهداوه

لافيها شر بيرمى شرار

ولافيها خلافات وغباوه

.......

فى الضلمة ليلك كله سكوت

كاشش فى جلدك كشة موت

تحس بالدفا تتدفا

أو تنتحر ،بس بدون صوت

..........

فى الضلمه أقولك وتقوللى

بدون خجل ولا ترللى

قلبك يدق بدون ترتيب

وتعيش حياتك فى تجلى

.........

فى الضلمة لمسة إيد بحنان

بتبقى سحر وطعمه جنان

بنندمج ونكون واحد

ونشرب المتعة فى فنجان

..........

فى الضلمة والسكه بعيده

بتحس بالخطوة جديدة

وربما غنيت الحان

وقلت للهم سعيده

.........

فى الضلمة للدنيا حلاوه

لاتقول عسل ولا بقلاوه

الطعم جى لك بالمحسوس

تحس وتدوق بسخاوه

.........

والضلمة تديك التفكير

تروق وتحلى بدون تعكير

تروح لقصدك كده على طول

بدون قلق وبدون تفاسير

..........

أما ان زهقت من الدنيا

الضلمة فيها حاجت تانيه

تشوفها بالفكر العالى

تعيش فى متعه ولو ثانيه

..........

ولو لقيت ياحبيبى وشوش

مليانه غل تقولش وحوش

تعالى عالضلمه تلاقى

جمال طبيعى مافيهش رتوش

.........

الضلمه هى اساس الكون

وفيها سحر بطعم ولون

تعيش حياتك زى هواك

وتبقى حر ولو مسجون

.........

.يارب خلى لنا الضلمة

وادينا مالدنيا الحكمة

بالأولى نهرب مالأحزان

والتانيه نقبل بالقسمه

...........

خلاص ياضلمة انا ليكى صديق

حبة دقايق كده عالريق

واروح لنور الله فى الكون

ماهوه صاحبى فى كل طريق

.............

أم الدموع

ياام الدموع ابلعى

 دمعك مع الحرمان

 الدمع لابينتهى

ولاتنتهى الاحزان

 اللى انتهى فى ارضنا

 احساسنا بالانسان

 يموت يعيش

كلها عند الحكومه سيان

يامصر

 ليه انطفى

 نور الحنان فيكى

 حضن  المودة اختفى

والليل مغطيكى

 ومنين نجيب الصفا

والحقد ماليكى

 بالله يامصر ارجعى

خليكى زى زمان

ياام الدموع ابلعى

 دمعك مع الحرمان

 عيشة المرارة سواد

 والظلم  صار ياما

والليل فى مصر انعاد

وهمومه  دوامه

 تروى الدموع همنا

والكلمة لوامه

 يامصر لو تسمعى

 راح ترحمى الشقيان

ياام الدموع ابلعى

 دمعك مع الحرمان

اسلامنا مش مكلمه

ولا قول بدون افعال

اسلامنا دين مرحمه

 وبخاصه عالاطفال

حتقولوا ايه لربنا

ولا ّدى مش عالبال

يامصر لو ترفعى

لله دعا الايمان

حيعود لنا فى ارض

احساسنا بالانسان