قول انا مصرى
.............
يادى البهجه ويادى النور
مصر شبابها بقالهم دور
هزوا الدنيا بأحلى مفاجأه
لما اجتمعوا وقالوا نثور
..............
يادى البهجه ويادى الفرحه
لما نشوف الأشجار طارحه
لما نشوف لبلدنا الحره
شعب جسور بيقوم وبيصحى
.............
ربنا يابنى يبارك سيرك
بعد ماقمت تمارس دورك
اوعى تهادن أو تتنازل
أو تتغر وتنسى ضميرك
...........
عايزك يابنى بنفس القوه
تفرض رأيك خطوه بخطوه
ترجع مصر بايدك حره
شعبها حاكم بره وجوه
..............
واللى كروشهم صبحت بير
مهما بتاخد عايزه كتير
خدهم يابنى بكل عزيمه
دخلهم قوضة التطهير
...........
وارفع يابنى بعزه الهامه
قول انا مصرى وعندى كرامه
ساعة الجد دراعى سلاحى
واللى مايعرف حيشوف ياما
............................
واجعل يابنى العدل سلاحك
تلقاه بلسم يشفى جراحك
واوعى تفكر تظلم واحد
أحسن تخسر قوة روحك
.................
ولاتنساش ترجع لإخواتك
برضه الشورى تحقق ذاتك
لما تشاور فايده لبلدك
والمولى يبارك فى حياتك
.................
اما أخيراً .. تمشى سليم
حتعيش حر الكلمه كريم
ترفع راسك ،تفتح عينك
تاخد حقك فى التكريم
................
المشاركات
ليست هناك تعليقات:
إرسال تعليق