ياصغيرين
...........
ياصغيرين
يامقطقطين
ياللى انتو مش قد الكبار
نظرتنا ليكم إنكم شبان صغار
فى عنيكو صبح ف أوله
وشنبكو لسه فيه خَضار
وقلوبكو دافيه ولينه
لساها عايشه فى حضن ماما
ومش حتقدر عالصراع
أو حتى يبقى لها إختيار
محتاجه خبره من السنين
محتاجه ينشف عضمها
يصبح متين
محتاجه تتعلم كتير
عشان تخش المعمعه
مش خرعه أو مدلّعه
ياصغيرين
يامقطقطين
لقيتونا شايلين الأنين
ماشيين بنشكى ف همنا
ومذبوحين
واللى ف إيديه المسأله
ودانه الاتنين مقفولين
رميتوا توب المسكنه
اللى احنا لابسينه هنا
رميتوا قهر النفس
دمع المظلومين
وخد توا مصر فى حضنكوا
ورحتوا عالميدان هناك
عشان تقابلوا الجبارين
ياصغيرين
يامقطقطين
وكبرتوا وبدون انتظار
وبقيتوا أكبر مالكبار
رسمتوا فوق وش السكات
روح كبرياء زى العسل
وبقيتوا قنديل الأمل
وشمس بتصون عمرنا
وعرضنا
وبدر نّور بالكرامه ف أرضنا
خلانا شفنا إننا
مع إننا احنا الكبار
لكننا عشنا السنين
مع الحروف من غير عمل
عشنا السنين مليانه خوف
بدون مانسأل عن نهايه للى كان
أو حتى نسأل إيه حصل
وادينا أصبحنا النهارده صغيرين
أما الصغار فقاده للغد الجميل
هما الأمل
هما الأمل
المشاركات
ليست هناك تعليقات:
إرسال تعليق